Bagera Elkartea izango da aurtengo Donostiako Piraten Matti!
2026-07-16 - Bagera
Aurtengo Aste Nagusia berezia izango da guretzat. Poz eta harrotasun handiz jakinarazi nahi dizuegu Donostiako Piratek Bagera hautatu dutela aurtengo Matti izateko. Hiriko mugimendu herritar eta euskaltzaletik jasotako aitortza honek indarberritu egin gaitu, egunero elkarrekin eraikitzen ari garen Donostia euskaldun, bizi eta parte-hartzaile horren erakusgarri baita.
Olatu berean arraunean: partekatzen ditugun balioak
Matti izatea ohorea izateaz gain, bi mugimenduok iparrorratz bera partekatzen dugula berresteko balio digu. Bagerak eta Donostiako Piratek esparru ezberdinetatik lan egiten dugu, baina helburu eta balio berberen alde ari gara igerian:
• Euskara erdigunean: Piratek argi erakutsi dute jaiak euskaratik eta euskaraz goza daitezkeela, asimilazioari aurre egin, gune euskaldun askeak sortu eta hiriko kaleak berreskuratu dituzte. Bageratik ere, filosofia berberarekin, hiriko gainerako eremuetan (aisialdian, kulturan, merkataritzan zein lan-munduan) euskara erdigunean jartzeko espazio horiek irabazten eta bermatzen jarraitzen dugu.
• Auzolana eta herri-mugimendua: Behetik gora eta komunitatearen indarrez eraikitako proiektuak gara biak. Sinetsita gaude herritarren sareak, inplikazioak eta autogestioak soilik berma dezaketela benetako eraldaketa. Donostia ez da soilik postal bat; donostiarrok auzolanean osatzen dugun komunitatea da.
• Eredu parte-hartzailea: Jai-eredu kontsumista baten aurrean, parte-hartzeari eta sormenari bide ematen diote Piratek. Bageran ere hiztun aktiboak eta ahaldunak bilatzen ditugu, euskararen erabileraren jabe egin eta hiriko dinamiketan aktiboki eragin dezaten.
Ospatzeko garaia da: zatoz Piraten bazkarira!
Aitortza honek dakarren ardurari eta ilusioari behar bezala erantzuteko, Bagerak jaietako hainbat ekintzatan parte hartuko du abuztuan zehar. Baina badago hitzordu berezi bat dagoeneko egutegian gorriz markatu nahi duguna: abuztuaren 12ko Piraten bazkaria.
Bagerakide guztiak gonbidatu nahi zaituztegu egun horretan gurekin biltzera.
Piratei gure esker ona adierazteko eta Donostiako euskaltzaleok giro ederrean saretzeko aukera bikaina izango da. Prezioa 15-20 € inguruan ibiliko da, eta laster zabalduko dugu izena emateko eta txartelak eskuratzeko bide zehatza.
Prestatu zapiak eta abordatzera! Gora Donostiako Piratak eta gora Donostia euskalduna!